كلام فــــ سرك

كلام فـــ سرك

احترت أنى أكتب المقال ده بالعامية أو بالفصحى , بس وأنا بكتبه , فكرت ايه اللى هيكون أقرب الى الناس, ايه اللى هيفهمه الناس اكثر , لقيتها العامية ... لأنها لها قدرة كبيرة ع فهم واستيعاب الناس ... فيمكن ده السبب اللى خلانى أكتب بيها .

المهم بقى .... تعرف أن أنا و أنت فى كلية العلوم .... اه والله ... وتعرف كمان أن أنا وأنت دخلنها غصب عننا, بس تعرف فى فينا اللى رضى بأمره الواقع وقال أنا هغير حياتى علشانها , هرتب طموحاتى تانى , أنا مش هكون أنسان عادى... اتولد علشان يموت ومن غير مايعمل حاجة لبلده أو مجتمعه.

كلنا عارفين أن كل واحد فينا كان له حلم ،رتب عليه حياته ، وعمل اللى عليه علشان يوصله, بس ربنا أخترلنا كده ، وأكيد ده هيكون خير لينا ومش معنى كده أنى أوقف أفكارى علشان حلمى ضاع.. لأ بالعكس .. أنا هتحدى الناس كلها .. وهبدأ أفكر تانى ف مستقبلى .. وهبدأ أفكر أنى أكون انسان مميز..

متقولش أنا هرضى بالأمر الواقع وتسكت..قول هرضى بالأمر الواقع وهغير حياتى للأحسن ... وهكون فعلا انسان ناجح ..ومهما كانت الظروف اللى حوليا .. هتغير.. أصل أنا عاوز أكون حاجة أفيد بيها دينى ونفسى ومجتمعى .

كل واحد فينا عنده أفكار كتيرة فـ عقله... أفكار متميزة .. بس هو مش مدي نفسه فرصه لأفكاره ..ومش عنده الحماسة أنه يطلعها

أنت ليك قيمة كبيرة مش قمتك أنك تعيش وتموت وأنت معملتش حاجة ..لازم تسعى وتعمل ... متقولش مش هقدر.. أنت ناقصك ايه .. ناقصك ايه عن الناس الناجحة والعلماء ... أه العلماء .. أنت مش ناقص عنهم حاجة .. كونهم وصلوا للى هما فيه فده ناتج عن تشغيل عقلهم ... وتحديهم للظروف وشجاعتهم..

فكر كده وقول هتعمل ايه لبلدك ... قول أنا ايه هدفى فى حياتى.. قول أنا عايش ليه

 ملكش دعوه باللى حوليك . متقلدش حد من صحابك ...نجاحك هيبقى لنفسك مش لحد تانى ..

عارف أن الطفل المصرى ده أذكى طفل ف العالم ... دى حقائق علمية ودراسات أكدت كده . لأ ...وغير كده كمان معاه حاجة عظيمة أوى اسمها الاسلام .. أمال أمريكا واسرائيل بتحاربنا ليه أمال مش عاوزة مصر تتقدم ليه.. مصر لو أتقدمت هتفوق كل الدول ..لأ أبنائها متميزين ف كل حاجة .. وف كل المجالات..

كل الحكاية فيك أنت.. أنت اللى تقدر تغير مجرى حياتك.. أنت اللى تقدر توجه نفسك بأيدك.. استعن بربنا وأبدأ... يابنى أنت مش قليل ..ابدأ من دلوقتى ..

أنت فى كلية علوم ... كلية العلماء... رتب طموحك عليها... ومتقولش حياتى أنتهت عند كده بل بالعكس قول حياتى ابتدت.. قول أنا اتخلقت علشان أكون أنسان مميز. مش علشان أكون عادى زى كل الناس.. هعمل المستحيل وهبدء من دلوقتى حتى لو فشلت هقوم تانى ... لازم نبذل مجهود ف حياتنا علشان نوصل .. بس أهم حاجة أنك تستعين بربنا ..وربنا مش هيضيع تعبك أبدا.. أصل ربنا عظيم أوى .. وقادر انه يعمل أى شئ جل و علا..بس انت أعبده صح وتوكل عليه وأعرف أن ربنا شايفك وسمعك وكمان بيحبك...يابنى ده هو اللى خلقك وحنين عليك أكثر من مامتك وبباك .. وهتلاقيه قدامك ومعاك وسامع دعائك بس مـأجله شويا .. ربنا عظيم ومن عظمته أنه بيسمعلك وأنت عبده .. وبيفرح بيك أوى لما تتوب له و ترجعله ..

خلاص أحنا هنتغير .. وهنتغير للأفضل باذن الله .. وهنخرج أفكارنا ونسعى لكده ... دور فى نفسك أكيد هتلاقى نفسك متميز فى أى حاجة ... وأجعل لك فى كل فرصة نصيب .. وأخرج لحياة تانية ... حياة مفهاش يأس ولا خوف .. حياة كلها طموح وأمل.. وأستعن بالله دايما..

أنت ارادتك.... هتشكل حياتك سواء نجحت أو فشلت.. فنجاحك أو فشلك من صنعك أنت..أنت القوة ....أنت من يستطيع ازاله العقبات من أمامك .. أنت وحدك مالك قدرك.. فزت أم خسرت فالأختيار هو أختيارك والمسئوليه هى مسئوليتك.

بقلم :

ضحى عبداللطيفܓܛܟ